Orationes

TEMPUS ADVENTUS

Dominica I Adventus

Collecta

1 Da, quaesumus, omnipotens Deus,

hanc tuis fidelibus voluntatem,

ut, Christo tuo venienti iustis operibus occurrentes,

eius dexterae sociati, regnum mereantur possidere caeleste. Per Dominum

Super oblata

2 Suscipe, quaesumus, Domine, munera

quae de tuis offerimus collata beneficiis,

et, quod nostrae devotioni concedis effici temporali,

tuae nobis fiat praemium redemptionis aeternae. Per Christum.

Post communionem

3 Prosint nobis, quaesumus, Domine, frequentata mysteria,

quibus nos, inter praetereuntia ambulantes,

iam nunc instituis amare caelestia et inhaerere mansuris. Per Christum.

Dominica II Adventus

Collecta

4 Omnipotens et misericors Deus,

in tui occursum Filii festinantes

nulla opera terreni actus impediant,

sed sapientiae caelestis eruditio

nos faciat eius esse consortes. Qui tecum vivit.

Super oblata

5 Placare, Domine, quaesumus,

nostrae precibus humilitatis et hostiis

et, ubi nulla suppetunt suffragia meritorum,

tuae nobis indulgentiae succurre praesidiis. Per Christum.

Post communionem

6 Repleti cibo spiritalis alimoniae,

supplices te, Domine, deprecamur,

et, huius participatione mysterii,

doceas nos terrena sapienter perpendere

et caelestibus inhaerere. Per Christum.

Dominica III Adventus

Collecta

7 Deus, qui conspicis populum tuum

nativitatis dominicae festivitatem fideliter exspectare,

praesta, quaesumus,

ut valeamus ad tantae salutis gaudia pervenire,

et ea votis sollemnibus alacri semper laetitia celebrare. Per Dominum.

Super oblata

8 Devotionis nostrae tibi, Domine, quaesumus,

hostia iugiter immoletur,

quae et sacri peragat instituta mysterii,

et salutare tuum nobis potenter operetur. Per Christum.

Post communionem

9 Tuam, Domine, clementiam imploramus,

ut haec divina subsidia, a vitiis expiatos,

ad festa ventura nos praeparent. Per Christum.

Dominica IV Adventus

Collecta

10 Gratiam tuam, quaesumus, Domine, mentibus nostris infunde,

ut qui, Angelo nuntiante,

Christi Filii tui incarnationem cognovimus,

per passionem eius et crucem

ad resurrectionis gloriam perducamur. Per Dominum.

Super oblata

11 Altari tuo, Domine, superposita munera

Spiritus ille sanctificet,

qui beatae Mariae viscera sua virtute replevit. Per Christum.

Post communionem

12 Sumpto pignore redemptionis aeternae,

quaesumus, omnipotens Deus,

et quanto magis dies salutiferae festivitatis accedit,

tanto devotius proficiamus

ad Filii tui digne nativitatis mysterium celebrandum. Per Christum.